अन्नपूर्णमा सामुदायिक विद्यालयप्रतिको आकर्षण

बैशाख १५, २०७६

एटुजेट अनलाइन खबर

पोखरा, वैशाख १५ – सामुदायिक विद्यालयप्रतिको आकर्षण घट्दै गएको अवस्थामा कास्कीको अन्नपूर्ण गाउँपालिकाभित्रका सामुदायिक विद्यालयमा भने विद्यार्थी सङ्ख्या बढ्दो क्रममा छ ।

गुणस्तरीय शिक्षाका लागि गाउँपालिकाका साथै सम्बन्धित विद्यालयले चासो दिन थालेसँगै विद्यार्थी तथा अभिभावकको रोजाइ सामुदायिक विद्यालय पर्दै गएको हो । बसाइँ सरेर अन्यत्र गएका बाहेक गाउँपालिकाका अघिकांश वडाका विद्यार्थी सामुदायिक विद्यालयमा नै भर्ना भएको गाउँपालिकाका शिक्षा, युवा तथा खेलकूद शाखाका प्रमुख बलराम भुगाइँले बताए ।

‘हामी यतिखेर गाउँपालिकामा भर्ना अभियानमा छौँ’, उनले भने, ‘शैक्षिक गुणस्तरीयता अभिवृद्धि, पूर्वाधार विकासलगायतका कारणले विद्यार्थी तथा अभिभावकको आकर्षण सामुदायिक विद्यालयमा बढ्दै गएको छ ।’ गाउँपालिकाले आफ्नो वार्षिक नीति तथा कार्यक्रममा विद्यालय उमेरका सबै बालबालिकालाई विद्यालयमा भर्ना गराइ ती विद्यार्थीलाई टिकाएर माध्यमिक तहसम्मको शिक्षा पूरा गराउने नीति अवलम्बन गरिने उल्लेख गरेको थियो ।

त्यस्तै शैक्षिक गुणस्तर वृद्धिका लागि विभिन्न शैक्षिक कार्यक्रम सञ्चालन गरिने नीति तथा कार्यक्रममा उल्लेख छ । विषयगत स्तरीयता अभिवृद्धिका लागि गाउँपालिकामा विषयगत शिक्षकको समूह गठन गरिएको शाखा प्रमुख भुगाइँले जानकारी दिए । विषगत शिक्षकका साथै शिक्षकको तालीमलाई प्राथमिकतामा राखिएको बताइएको छ ।

 

उनका अनुसार अघिल्लो वर्ष एसइईको परीक्षाफलपछि प्रत्येक शिक्षकलाई विद्यार्थीले प्राप्त गरेको जिपिएका आधारमा विषयगत उपलब्धिको समीक्षा गर्दै आगामी वर्षका लागि कति जिपिएसम्म ल्याउन सकिन्छ भन्ने गोप्य लिखित प्रतिबद्धता लिइएको थियो । यस वर्षको परीक्षाफल आएसँगै शिक्षकबाट लिइएको प्रतिबद्धता र विद्यार्थीले प्राप्त गरेको उपलब्धि मूल्याङ्कन गरी राम्रो गर्न सक्नेलाई पुरस्कृत गरिने बताइएको छ ।

गाउँपालिकाका तर्फबाट सामुदायिक विद्यालयको पूर्वाधार विकासमा कुनै कमी नगरेको अन्नपूर्ण गाउँपालिकाका अध्यक्ष युवराज कुँवरले बताए । ‘हामी भौतिक पूर्वाधारमा कमजोर छैनाँै, अब कसरी गुणस्तरीय शिक्षा दिन सकिन्छ भन्ने विषय नै सबैको चासो र चिन्ताको विषय हो’, उनले भने, ‘गाउँपालिका, विद्यालय, विद्यार्थी तथा अभिभावक सबैको सामूहिक प्रयासमा शिक्षाको गुणस्तरीयता बढाउन सकिने सोचका साथ अघि बढेका छौँ ।’

गाउँपालिकामा सामुदायिक विद्यालयको सङ्ख्या ५२ र संस्थागत विद्यालय पाँच रहेको छ । गाउँपालिकाले सामुदायिक विद्यालयको गुणस्तरीयताका साथै भर्ना अभियानलाई सफल पार्न विद्यालय, जनप्रतिनिधि, शिक्षक तथा अभिभावक सबैसँग सहकार्य गर्दै अघि बढेको उनले बताए ।

पछिल्ला वर्षमा विद्यार्थी तथा अभिभावक सामुदायिक विद्यलायमा आकर्षित बन्दै गएको सिद्ध आधारभूत विद्यालय लुम्लेका अङ्ग्रेजी विषयका शिक्षक सन्तोष सुवेदीले जानकारी दिए । सामुदायिक विद्यालयले शैक्षिक गुणस्तरीयताका लागि थालेको प्रयास, विद्यार्थी तथा अभिभावकमा पर्दै गएको सामुदायिक विद्यालयप्रतिको सकारात्मक सोचले क्रमशः आकर्षण बढिरहेको उनले बताए ।

सामुदायिक विद्यालयप्रतिको आकर्षणले राज्यले यी विद्यलायमा गरेको पाठ्यपुस्तक, छात्रवृत्ति एवं पूर्वाधार विकासका योजना आदिको लगानी खेर नजाने शिक्षक सुवेदीको तर्क छ । सिद्ध आधारभूत विद्यालयमा प्रविधिमा आधारित सिकाइलाई लक्षित गरी एउटा कक्षालाई ‘स्मार्ट’कक्षा बनाइएको प्रधानाध्यापक टङ्कप्रसाद देवकोटाले बताए । अघिल्ला वर्षका तुलनामा यस वर्ष विद्यार्थी सङ्ख्या बढेको उनको भनाइ थियो ।

विद्यार्थीको सुविधालाई लक्षित गरी यहाँको माछापुच्छ«े माविले यस वर्षदेखि विद्यालय बस सञ्चालनमा ल्याएको छ भने अन्य विद्यालयले पनि विद्यार्थीलाई अधिकतम सुविधा दिनेतर्फ सोच बढाएका छन् । गाउँपालिकाले ‘शिक्षकलाई सम्मान गरौँ, बालबालिकालाई माया गरौँ’, ‘सबै प्रकारका विकास मानवका लागि, मानव विकासका लागि गुणस्तरीय शिक्षा’ जस्ता आदर्श वाक्यलाई आत्मसात गर्दै शिक्षाको गुणस्तरीयतालाई प्राथमिकतामा राखेको जनाएको छ ।