पहिले २ घण्टा लाग्ने काम, अहिले २ मिनेटमै !

असार ०८, २०७७

एटुजेड अनलाइन खबर


कास्की, असार ८ : कास्कीको नापी कार्यालयमा  सेवाग्राहीको भिड घटेको छ। प्रमुख नापी अधिकृत खिमलाल गौतमका अनुसार कार्यालयले गत फागुनमा सार्वजनिक गरेको मोबाइल एप्स सेवाग्राहीले प्रयोग गर्न थालेपछि सेवाग्राहीका भिड घट्न थालेको हो।

‘हामीले गत फागुनमा भूमि प्रशासनमा पारदर्शी र सेवग्राही मैत्री बनाउनका लागि  ‘नापी पोखरा एसओकेपी’  एप्सको ल्याएका थियौँ, यसको प्रयोग बढ्दै गइरहेको छ, कोरोना सङ्क्रमणको अवस्थामा सेवाग्राहीले यसको प्रयोेगबाट सेवा लिन थाल्नुभएको छ,’ उनले भने।

उनले सो एपबाट दैनिक सेवा टोकन लिन, फारम भर्न, कित्ताकाट, हाल साबिक भिडाउन, नक्सा प्रिन्ट, नक्सा ट्रेस उतार, प्लट रजिस्ट्रार उतार, फिल्ड रेखाङ्कन, क्षेत्रफल ट्रायल चेक, कित्ता एकीकरण जानकारी लिने काम एप्सबाट भएको जानकारुी दिए।

बिचौलियालाई रोक्न कार्यालयबाट सेवा लिन आवश्यक विभिन्न निवेदनका ढाँचाहरु एपमा उपलब्ध भएकाले सेवाग्राहीलाई सहज भएको उनको भनाइ छ ।

जग्गा प्रशासनको क्षेत्रमा  पहिलोपटक सुरु गरिएको सो एप्सले अहिले कोरोना रोकथाममा भिडभाड नियन्त्रण साथै समयको बचत अनि विचौलियाको बिगबिगी रोक्न महत्वपूर्ण भूमिका खेलेको उनले बताए।

‘नक्सा लिन २ घण्टा लाग्ने काम अहिले २ मिनेटमा हुन थालेको छ, सेवाग्राहीले ‘रिक्वेस्ट’ पठाएर टोकन लिनुहुन्छ, त्यहीअनुसार आफ्नो काम र समय तोकेर सेवा प्रवाह हुन्छ,’ उनले भने । यसबाट कर्मचारी र सेवाग्राही दुवै लाभान्वित भएको उनले बताए।

उनका अनुसार नापी कार्यालयले बन्दाबन्दी खुकुलो भएपछि २ सयभन्दा बढीलाई सेवा दिइसकेको छ भने अहिले आधाभन्दा बढी काम एप्सबाट हुने गरेका छन् । कोभिड–१९ भन्दा अघि एप्सको प्रयोगाभ्यास त्यति हुन नसकेकामा अहिले एप्सको प्रयोग गर्ने बढ्न थालेका छन्  । कार्यालयमा बन्दाबन्दी अघि दैनिक २ सय सेवाग्राही आउने गरेको तथ्याङ्क छ । उनले  बन्दाबन्दीमा पनि कार्यालय बन्द नगरी राष्ट्रिय योजनाका काम आन्तरिक रूपमा गरिरहेको जानकारी दिए ।

एप्सबाट सेवा लिनुभएका पोखराको मेगा बैंकमा कार्यरत कर्मचारी बिमला गुरुङले छिटोछरिटो सेवाका लागि एप्स निकै प्रभावकारी भएको बताए । उनले भने, ‘एप्सले कार्यालय गएर घण्टौँ कुरेर बस्नुपर्ने समय बचत भएको छ, अहिले  झन् एप्सको प्रयोग उपयुक्त छ ।’

उनले अनलाइनमा ‘रिक्वेस्ट’ पठाएलगत्तै सम्पूर्ण विवरणसहितको जानकारी आउने र केही समस्या भएमा कार्यालयबाट फोन गरेर पनि जानकारी दिने गरेकाले सेवा निकै प्रभावकारी भएको बताए ।