ताकमकोतमा परम्परागत सीप र प्रविधिको प्रयोगबाट मन्दिर निर्माण शुरु

माघ २९, २०७६

एटुजेट अनलाइन खबर


म्याग्दी, माघ २९ : म्यादीको धवलागिरि गाउँपालिका७ स्थित ऐतिहासिक ताकमकोतमा १६औँै शताब्दीकै शैलीमा मन्दिर निर्माण शुरु भएको छ । पुरातत्व विभागले ऐतिहासिक महत्वको ताकमकोतमा परम्परागत सीप र प्रविधिको प्रयोग गरेर मन्दिर बनाउन लागेको हो । ताकमकोतबाट विसं १२४६ देखि १५४५ सम्म बगाले थापाले र १५४६ देखि १८८२ सम्म मल्ल राजाले राज्य सञ्चालन गरेका थिए ।

थापा र मल्लकालीन इतिहास झल्कने गरेर पुरातत्व विभागले नयाँ मन्दिर निर्माण गर्न लागेको कोतमन्दिर पुनःनिर्माण समितिका अध्यक्ष तेजिन्द्र थापाले जानकारी दिए । संघीय सरकारले विनियोजन गरेको ४५ लाख बजेटबाट मन्दिर पुनःनिर्माणका लागि ठेक्का सम्झौता भएको छ ।

ठेकेदारले भक्तपुरका मजदुर, कालिगड ल्याएर मन्दिर बनाउन थालेको थापाले बताए । माटो, ढुंगा र काठको प्रयोग गरेर मन्दिर निर्माण गर्ने पुरातत्व विभागले जनाएको छ । सांसदद्वय भूपेन्द्रबहादुर थापा र थममाया थापाको पहलमा विभागले बजेट विनियोजन गरेको थियो ।

अठार मिटर लम्बाइ र १२ मिटर चौडाइको जमीनमाथि मन्दिर निर्माण हुने भएको छ । चालू आर्थिक वर्षभित्रै मन्दिर बनाइसक्ने लक्ष्य छ । सोह्राँै शताब्दीमा निर्माण भएको ताकमकोत विसं १९९० र २०७२ को भूकम्पका कारण जीर्ण बनेको थियो । चन्दा संकलनबाट करीब ९० लाख खर्चेर समुदायले गत असोजमा ताकमकोत र जगन्नाथ अन्नपूर्ण मन्दिर पुनःनिर्माण गरेका थिए ।

सो मन्दिर सिमेन्ट, रड प्रयोग गरी पुनःनिर्माण भएको हो । ऐतिहासिक सम्पदाको संरक्षण गर्न पुरातत्व विभागले छुट्टै अर्को मन्दिर बनाउन लागेको बताइएको छ । मन्दिर संरक्षणका लागि धवलागिरि गाउँपालिकाले पनि १० लाख विनियोजन गरेको छ ।

पहिलो चरणमा कोतघर, अन्नपूर्णजगन्नाथ मन्दिर, सत्तल र सार्वजनिक शौचालय निर्माण गरिएको ताकमकोत पुनःनिर्माण समितिका अध्यक्ष थापाले बताए । कोतमा ऐतिहासिक महत्वका तोप, तरबार, खुँडा, खुकुरी, ढाललगायतका हातहतियार छन् ।

म्याग्दीको प्रमुख शक्तिपीठ मानिने ताकमकोतको जगन्नाथ अन्नपूर्ण मन्दिरमा पूजाआजा र भाकल गरेमा मनोकांक्षा पूरा हुने विश्वास छ । जगन्नाथ, अन्नपूर्ण, दुर्गालगायत देवीदेवताको मूर्ति रहेका यहाँ नवदुर्गा, जेष्ठी पूर्णिमा, मंसिर पूर्णिमा, चैत्राष्टमी पर्वका अवसरमा विशेष मेला लाग्ने गर्छ । समुद्री सतहदेखि दुई हजार ५०० मिटरको उचाइमा अवस्थित ताकमकोतबाट गुर्जा, धवलागिरि, निलगिरि, अन्नपूर्ण र माछापुच्छ«े हिमशृंखलाको साथै मनोरम पहाडी भूगोल, ग्रामीण बस्ती र सूर्योदयको दृश्यावलोकन गर्न सकिन्छ ।