हुम्ला विमानस्थलमा दुई फिटसम्म हिउँ, तीन दिनदेखि हवाई सेवा अवरुद्ध

माघ २२, २०७८

एटुजेड अनलाइन


हुम्ला, माघ २२ : हिमाली जिल्ला हुम्लाको एक मात्र यातायातको साधन हवाई सेवा अवरुद्ध भएको छ । दुई दिनदेखि लगातार हिमपात हुनु र शनिबार मौसममा सुधार आएको भएपनि विमानस्थलमा दुई फिटभन्दा बढी हिउँ जमेको कारण हवाई सेवा अवरुद्ध भएको हो ।

नागरिक उड्यायन प्राधिकरण सिमकोट शाखाका प्रबन्धक मोहन गिरीले दुई तीन दिन लगातार हवाई सेवा अवरुद्ध भएको बताए । उनले २८ घण्टासम्म हिमपात भएको र शनिबार मौसममा सुधार आएर घाम लागेको भएपनि विमानस्थलमा दुई फिट हिउँ जमेको कारण विमानस्थल सेताम्मे भएकोले पूर्णरुपमा हवाई सेवा अवरुद्ध भएको बताए ।

उनले कार्यालयसँग भएको स्नोलक भईकलले एक फिट हिउँ मात्र फाल्न सक्ने तर विमानस्थलमा दुई फिट हिउँ जमेको कारण हिउँ पन्छाउन समस्या भइरहेको बताए । यद्यपि, हिउँ फाल्ने प्रयास भने गरिने भएको छ ।

बिहीबार, शुक्रबार र शनिबार नेपालगञ्ज र सुर्खेतबाट बिहानैबाट उडान भर्ने तयारी गरेको भएपनि हुम्लामा हिमपातको कारण उडान अवरुद्ध भएको हो । हवाई सेवा अवरुद्ध भएपनि जिल्ला बाहिरबाट आउने र जाने डेढ सय यात्रु समस्यामा पर्नुका साथै खाद्यन्न र कार्गोको सामान पनि ढुवानी हुन सकेको छैन ।

त्यसैगरी, हवाई सेवा अवरुद्ध भएपछि सिमकोट विमानस्थलबाट नेपालगञ्ज निकासी हुने जडिबुटी पनि रोकिएको छ । अब विमानस्थलमा जमेको हिउँ स्नोलक भेइकलले पन्छाएपछि मात्र हवाई सेवा सुचारु हुनेछ । सिमकोट विमानस्थलमा सीता, तारा, समिट र नेपाल एयरलाइन्सका विमानहरुले दैनिक पन्द्रभन्द बढी उडान भर्दै आएका थिए ।

हवाई सेवा अवरुद्ध भएसँगै हुम्लामा दैनिक उपाभोग्य सामाग्री, खाद्यन्न र तरकारीको समस्या हुन थालेको छ । यसवर्षको यो हिमपातको कारण तेस्रो पटक हवाई सेवा अवरुद्ध भएको हो ।