मापदण्ड विपरित स‍रकारी कार्यालयमा सञ्चालित चमेना गृहलाई कारबाही

फागुन १३, २०७७

एटुजेड अनलाइन खबर


काठमाडौं, फागुन १३ : काठमाडौंका केहि सरकारी कार्यालय परिसरमा सञ्चालित चमेनागृह मापदण्ड बिपरित रहेको पाइएको छ ।

बिहीबार जिल्ला प्रशासन कार्यालयले सरकारी कार्यालय परिसरमा सञ्चालित चमेनागृहको अनुगमन गर्दा मापदण्ड विपरित पाइएपछि कारवाही गरिएको हो ।

प्रशासन कार्यालयले बिहीबार आफ्नै कार्यालयको चमेना गृह, काठमाडौं जिल्ला अदालतको चमेना गृह, काठमाडौं जिल्ला अदालत बार एशोसियसन र नेपाल टेलिकमको चमेना गृहको अनुगमन गरेको थियो ।

अनुगमनका क्रममा काठमाडौं जिल्ला अदालत र काठमाडौं जिल्ला अदालत बार एशोसियसनको चमेना गृह मापदण्ड विपरित रहेको पाइएपछि उनीहरुलाई ५०–५० हजार रुपैयाँ जरिवाना गरिएको प्रशासन कार्यालयले जनाएको छ ।

त्यस्तै नेपाल टेलिकमको चमेना गृहलाई ५ हजार जरिवाना गरिएको प्रशासन कार्यालयका प्रशासकीय अधिकृत बिष्णुराज बेलवासेले जानकारी दिए ।

केहि चमेना गृह दर्ता विना नै सञ्चालन भएको, खाद्यवस्तु गुणस्तर नभएको पाइएको उनले बताए । चमेना गृहका बारेमा मौखिक तथा लिखित उजुरी आएपछि अनुगमन गरिएको उनले बताए ।

अनुगमनमा खाद्य, वाणिज्य, घरेलु विभागका साथै सुरक्षा निकायको पनि सहभागिता रहेको थियो ।